Акафіст Святителю Євменію, архієпископу Житомирському і Овруцькому

загрузить акафист *.pdf, *.doc

АКАФИСТ
Святи́телю Евме́нию,
Архиепи́скопу Жито́мирскому и О́вручскому

Конда́к 1

Избра́нный Це́ркви Зижди́теля крестоноси́телю ве́рный, страда́ния за Христа́ му́жественно претерпе́вый; любо́вь и́скреннюю па́ствы стяжа́л еси́, архипа́стырскими труда́ми Жи́тницы Небе́сныя наполня́л еси́, ве́рою и любо́вию Христу́ до конца́ послужи́л еси́. Мы же, творя́ще па́мять твою́ ублажа́ем тя си́це: ра́дуйся Евме́ние, ли́ка святи́тельскаго досто́йное украше́ние.

И́кос 1

А́нгелов Творе́ц, Госпо́дь Вседержи́тель, благода́тию свое́ю возводя́ челове́ка в пе́рвое досто́инство на Небеси́, избра́ тя, о́тче Евме́ние, да во святи́тельстком чи́не послу́жиши Ему́. Ты же, посто́м и моли́твою а́нгельски над ми́ром многомяте́жным к высоте́ Небе́сней возше́л еси́, прославля́я Того́ глаго́лами богодухнове́нными. Мы же умиле́нным се́рдцем пое́м ти:
Ра́дуйся, избра́нниче от ю́ности Христа́ возлюби́вый;
Ра́дуйся, у́зким путе́м до гра́да Вы́шняго неукло́нно ше́ствовый;
Ра́дуйся, свети́льниче, десни́цею Всевы́шняго возже́нный;
Ра́дуйся, архипа́стырю Бо́жий вои́стину преосвяще́нный;
Ра́дуйся Евме́ние, ли́ка святи́тельскаго досто́йное украше́ние.

Конда́к 2

Бу́рею искуше́ний и собла́знов мо́ре жития́ мирска́го волну́емое, не прельсти́ша тя, о́тче Евме́ние. Оста́вив бо суету́ тли ве́ка сего́, во град Бо́жий Ки́ев стопы́ своя́ напра́вил еси́, во оби́тели златове́рхия Архистрати́га во труда́х неуста́нно подвиза́лся еси́. Мы же Творцу́ не́ба и земли́, о́гнь любве́ боже́ственней в се́рдце твое́м возже́гшему, воспое́м: Аллилу́иа.

И́кос 2

Ви́дя тщету́ мирски́х попече́ний моли́лся ко Го́споду: «Скажи́ мне, Го́споди, путь во́ньже пойду́, я́ко к Тебе́ взя́х ду́шу мою́». Во оде́жду све́тлу и́ноческаго чи́на обле́клся еси́. О такове́м у́бо благонра́вии се́рдца твоего́ пое́м ти:
Ра́дуйся, ра́ди любве́ Христо́вы вся земна́я оста́вил еси́;
Ра́дуйся, Оте́чества Го́рняго ра́ди, вся кра́сная ми́ра сего́ ни во что́ же вмени́л еси́;
Ра́дуйся, на ра́ло ру́це свои́ во И́мя Госпо́дне возложи́л еси́;
Ра́дуйся, и́стинныя ра́дости прича́стником бы́ти возжела́л еси́;
Ра́дуйся Евме́ние, ли́ка святи́тельскаго досто́йное украше́ние.

Конда́к 3

Егда́ во́лны а́довы подыма́шася на Це́рковь правосла́вную и зе́млю на́шу, ты име́я ре́вность о спасе́нии и избега́я сете́й богобо́рческих, раско́ла обновле́нческаго, во оби́тель Ки́ево-Пече́рскую прите́кл еси́, и во уде́ле Богоро́дицы, в простоте́ се́рдца подвиза́лся еси́, некта́ром благода́ти преподо́бных в пеще́рах прозя́бших, услажда́лся еси́, поя́ Бо́гу: Аллилу́иа.

И́кос 3

Всеми́лостивый Госпо́дь тече́ние жи́зни челове́честей ко спасе́нию направля́ющий, наше́ствие иноплеме́нных, братоуби́йства и лютова́ния богобо́рцев по грехо́м на́шим попусти́. Ты же, о́тче Евме́ние во дни испыта́ния ве́ры, еди́ному Бо́гу рабо́тая в и́ноческих труде́х неосла́бно подвиза́лся еси. О сем достохва́льно взыва́ем ти:
Ра́дуйся, я́ко кре́ст лише́ния многотру́дный избра́л еси́;
Ра́дуйся, я́ко блаже́нства нищеты́ духо́вней облобыза́л еси́;
Ра́дуйся, я́ко стези́ пра́ведных путе́й позна́л еси́;
Ра́дуйся, я́ко от исто́чника приснотеку́щего благода́ть прия́л еси́;
Ра́дуйся Евме́ние, ли́ка святи́тельскаго досто́йное украше́ние.

Конда́к 4

Бу́ря испыта́ний не поколеба́ упова́ния твоего́ на Покро́в Бо́жией Ма́тери, егда́ по послуша́нию на подво́рие во град Петро́в, в «ма́лую Ла́вру» на труды́ равноа́нгельскаго жития́ по́слан был еси́. Я́ко безстра́шный и до́блий во́ин «шлем спасе́ния и меч духо́вный» восприя́х, ве́ру правосла́вную неустраши́мо, да́же до уз темни́чных испове́дал еси́ и на по́двизи страда́льческия себя́ обре́кл еси́ взыва́я прему́дрости Бо́жией: Аллилу́иа

И́кос 4

Слы́шавше благочести́вое и пра́ведное житие́ и́ноков Киево-Пече́рских на подво́рии Святы́я Ла́вры во гра́де Петро́вом безбо́жнии вла́сти я́ростию распали́шася и на суди́лище влеко́ша, иде́же клевету́ воздви́гше на тя, о́тче Евме́ние. Ты же па́мятуя глас Христо́в: «не убо́йтесь от убива́ющих те́ло, души́ же не могу́щих уби́ти» небоя́зненно пра́вду Бо́жию испове́дал еси́. Мы же воспомина́юще по́двиг испове́дничества твоего́ воспева́ем си́це:
Ра́дуйся, и́стины Христо́вой ве́рный служи́телю;
Ра́дуйся, лю́таго безбо́жия непоколеби́мый обличи́телю;
Ра́дуйся, ве́ры Правосла́вныя тве́рдый ревни́телю;
Ра́дуйся, у́зниче многострада́льный, Го́спода ве́рный свиде́телю;
Ра́дуйся Евме́ние, ли́ка святи́тельскаго досто́йное украше́ние.

Конда́к 5

Боготе́чная пресве́тлая звездо́ воссия́ла среди́ тьмы́ поги́бельной, испове́дниче Бо́жий! Ты бо у́зы, рабо́ты тя́жции, глад, хлад и боле́зни претерпе́в, ду́х сво́й ве́рою и моли́твою укрепля́л еси́, Го́споду же храни́вшему тя, благода́рственно воспева́л еси́: Аллилу́иа

И́кос 5

Ви́деша терпе́ние и ско́рби твоя́ во узи́лище, диви́мся кре́пости ду́ха твоего́, страда́льче Бо́жий Евме́ние, сла́вим Бо́га, яви́вшего на тебе́ чудесы́ си́лы Своея́. О́гнь бо страда́ний не ожесточи́ се́рдца твоего́, не попали́ ре́вности твоея́ я́же о моли́тве непреста́нней и де́лании и́ночестем. Сего́ ра́ди, от уз свободи́в, приведе́ тя Госпо́дь на Кавка́з ко избра́нным подви́жником Свои́м, Гли́нской пу́стыни ста́рцем, от них же напита́лся еси́ душеполе́зными наставле́ниями. Таково́е ве́дуще о тебе́ Боже́ственное промышле́ние, взыва́ем си́це:
Ра́дуйся, Иису́совою моли́твою се́рдце свое́ освяти́вый;
Ра́дуйся, позна́нием Сло́ва Бо́жия ра́зум свой просвети́вый;
Ра́дуйся, де́лание и́ноческое в миру́ сохрани́вый;
Ра́дуйся, в по́двизех сокрове́нных Бо́гу угоди́вый;
Ра́дуйся, Евме́ние, ли́ка святи́тельскаго досто́йное украше́ние;

Конда́к 6

Про́мыслом Бо́жиим, о́тче Евме́ние, в честны́й град Ки́ев возврати́лся еси́ и во оби́тели Пече́рстей бре́мя служе́ния церко́внаго подъя́л еси́. В по́двизех мно́зех кро́тко и незло́биво бра́тии служа́ще, са́ном свяще́нства почте́н был еси́ и с ве́лиим благогове́нием Безкро́вную Же́ртву приноси́л еси́. Сего́ ра́ди досто́йную похвалу́ возно́сим Бо́гу Тайносоверши́телю. Аллилу́иа.

И́кос 6

Возсия́л еси́ благода́тию за всеце́лое отрече́ние во́ли своея́, егда́ в боле́зни сме́ртней ко исхо́ду души́ предуготовля́яся, равноа́нгельскаго по́стрига в вели́кую схи́му сподо́бился еси́. Го́спода благодаря́ще и мы вопие́м ти си́це:
Ра́дуйся, ве́лиим терпе́нием, враго́в ви́димых и неви́димых посрами́вый;
Ра́дуйся, в по́двизе поста́, плот́ь свою́ ду́хови покори́вый;
Ра́дуйся, моли́твою усе́рдною, непреста́нно и́мя Иису́сово в се́рдце носи́вый;
Ра́дуйся, кро́тостию и смире́нием, да́ры Ду́ха Свята́го стяжа́вый;
Ра́дуйся, Евме́ние, ли́ка святи́тельскаго досто́йное украше́ние;

Конда́к 7

Цари́це Небе́сная хотя́ яви́ти стра́ждущему наро́ду Бо́жиему свети́льника Своего́, в ди́внем виде́нии со́ннем яви́ся митрополи́ту Ки́евскому Иоа́нну и повеле́ же́зл служе́ния святи́тельскаго вручи́ти эконо́му оби́тели Своея́ Евме́нию, его́ же чу́дным о́бразом вско́ре исцели́. О се́м похвалу́ досто́йную возно́сим Бо́гу. Аллилу́иа

И́кос 7

Но́вое вско́ре Госпо́дь яви́ вразумле́ние митрополи́ту Иоа́нну, егда́ посеща́я Ла́вру узре́х тя о́тче здра́ваго во врате́х оби́тели срета́юща, уразуме́ я́ко вои́стину Бо́жия Ма́терь бре́мя святи́тельскаго служе́ния на тя возложи́. Зря́ще таково́е произволе́ние о тебе́ воспои́м:
Ра́дуйся, ско́ро прия́вший чу́дное исцеле́ние;
Ра́дуйся, земли́ Букови́нския ве́лие утеше́ние;
Ра́дуйся, па́ствы Поле́сския прему́дрое назида́ние;
Ра́дуйся, гра́да Жито́мира неодоли́мое огражде́ние;
Ра́дуйся, Евме́ние, ли́ка святи́тельскаго досто́йное украше́ние;

Конда́к 8

Сла́вным явле́нием си́лы Бо́жия в годи́ну гоне́ний и испыта́ний, бы́сть многотру́дное служе́ние архипа́стырское твое́. Кре́пкою руко́ю корми́ло Це́ркви направля́я, чин церко́вный благоле́пно исполня́я, ду́шу свою́ за па́стыри и о́вцы полага́я и на у́зкий пу́ть спасе́ния наставля́я. На Бо́га Вседержи́теля упова́я, взыва́л к Нему́: Аллилу́иа.

И́кос 8

Всего́ себе́ на страда́ния и боль душе́вную обрека́я, дерзнове́нною моли́твою «ма́лое ста́до» от «волко́в» охраня́л еси́, незло́бием и смире́нием клевету́ растворя́л еси́, дара́ми духо́вными не́нависть враго́в ве́ры умиря́л еси́. Сего́ ра́ди поклоня́яся пред по́двигом испове́дничества твоего́ пое́м ти:
Ра́дуйся, уста́вов церко́вных преизря́дный храни́телю;
Ра́дуйся, благоле́пия хра́мов де́ятельный рачи́телю;
Ра́дуйся, Взбра́нной Воево́де ве́рный служи́телю;
Ра́дуйся, Це́ркви Христо́вой пла́менный ревни́телю;
Ра́дуйся, Евме́ние, ли́ка святи́тельскаго досто́йное украше́ние!

Конда́к 9

Все естество́ а́нгельское удиви́ся зря́ще полноту́ дарова́ний духо́вных на тя излива́ющуюся: стра́ха Бо́жия, прему́дрости и ве́дения. И́ми же зло́бу ми́ра сего́ разруша́я, ду́ши заблу́дшия направля́я, неве́рие и сомне́ния исцеля́я, в простоте́ ду́ха ко Го́споду Сердцеве́дцу хвалу́ вознося́, воспева́л Ему́: Аллилу́иа.

И́кос 9

Вети́и многовеща́нии не возмо́гут досто́йно восхвали́ти труды́ твоя́, о́тче пра́вый; я́ко хра́мы благоукраша́яй, пе́ние церко́вное благозву́чным устроя́яй, о душа́х ю́ных неосла́бное попече́ние име́яй и на убо́гих призира́яй. По пра́ву стяжа́л еси́ любо́вь нелицеме́рную па́ствы твоея́, взыва́ющую ти:
Ра́дуйся, Престо́ла Бо́жия неле́ностный служи́телю;
Ра́дуйся, душа́м ю́ным поко́рности учи́телю;
Ра́дуйся, убо́гим в ско́рбех те́плый уте́шителю;
Ра́дуйся, наро́да Бо́жия наста́вниче и храни́телю;
Ра́дуйся, Евме́ние, ли́ка святи́тельскаго досто́йное украше́ние!

Конда́к 10

Спасти́ся и в ра́зум и́стины приити́ хотя́ всем челове́ком, ты ко труда́м святи́тельским труды́ прилага́л еси́ и я́ко и́стинный мона́х непреста́нную моли́тву не оставля́л еси́; в уедине́нии серде́чнем пребыва́я, к веща́м скороги́бнущим ми́ра сего́ не прилепля́тися науча́я, Бо́гу Тайнови́дцу восклица́л еси́: Аллилу́иа.

И́кос 10

Стена́ яви́лся еси́ боле́зной отрокови́це Ни́не, под крило́ моли́твы своея́ взяв ея́, в виде́нии духо́внем ма́нтиею свое́ю покрыва́я, наставля́л и забо́тою огражда́л, прови́дя в ней уго́дницу Бо́жию, подви́жницу и основа́тельницу оби́тели и́ноческия. Сего́ ра́ди схимона́хиня Рафаи́ла с се́страми оби́тели Анастаси́евския богоспаса́емого гра́да Жито́мира благогове́йно па́мять о тебе́ храня́ пою́т ти вку́пе с на́ми:
Ра́дуйся, в по́двизех ве́лие вспоможе́ние;
Ра́дуйся, в моли́тве ско́рое укрепле́ние;
Ра́дуйся, в уедине́нии ти́хое наставле́ние;
Ра́дуйся, целому́дрию тре́петное огражде́ние;
Ра́дуйся, Евме́ние, ли́ка святи́тельскаго досто́йное украше́ние!

Конда́к 11

Пе́нием всеумиле́нным, на богослуже́нии всено́щнем, во хра́ме собо́рнем лю́дие моля́щася; не́ции же дивля́хуся, зря́ща тя в алтаре́ в вели́цей схи́ме ходя́ща. Егда́ же по отпу́сте слу́жбы узна́ша, я́ко в сие́ вре́мя те́лом в Ла́вре Святе́й пребыва́л еси́, и́злиха удиви́шася вопия́ху ди́вному во святы́х Свои́х Бо́гу: Аллилу́иа.

И́кос 11

Благода́ть и ми́лость сугу́бо прия́л еси́, егда́ прови́дя кончи́ну свою́, призва́л из Ла́вры Пече́рстей отце́в, сомоли́твенников да́вних. Егда́ боле́знь тя́жкая осла́била у́зы и вси́ ча́яли здра́вия твоего́; ты же зате́плив лампа́ду еле́ем ума́стил те́ло свое́ и повеле́л отце́м ка́нон на исхо́д души́, глаго́лати. По оконча́нии же его́ возле́г на одр и моли́твенно воздохну́в: «Предаю́ дух мо́й в ру́цы Твои́, Го́споди», ми́рно отше́л еси́. Ви́дя чу́дную кончи́ну твою́, пое́м ти:
Ра́дуйся, успе́ния преподо́бных удосто́ивыйся;
Ра́дуйся, я́ко узре́в лик А́нгела Храни́теля свое́го, возра́довался;
Ра́дуйся, све́том ли́ков Святы́х, просвети́лся;
Ра́дуйся, Пресве́тлый Лик Го́спода ви́дети сподо́бивыйся;
Ра́дуйся, Евме́ние, ли́ка святи́тельскаго досто́йное украше́ние!

Конда́к 12

Пою́ще пе́сни погреба́льная, в день Успе́ния Бо́жией Ма́тери, мо́ре лю́да правосла́внаго погреба́ху те́ло твое́ под алтаре́м хра́ма апо́стола Иа́кова, бра́та Госпо́дня. Бли́жняя твоя́ па́мятуя, я́ко преподо́бный Ку́кша, с ко́им ты, о́тче мно́гая ле́та сотаи́нником в дру́жбе и моли́тве пребыва́л еси́, возвести́ ти слова́ прови́дческия: «Влады́ко, ты по сме́рти му́чим бу́деши», недоумева́я взыва́ли Бо́гу: Аллилу́иа.

И́кос 12

По трие́х же ле́тех успе́ния твоего́, враг ро́да челове́ческаго, рука́ма люде́й безбо́жных над моща́ми твои́ми поруга́ся. Егда́ же раба́ Бо́жия Мария́ те́ло твое́ расте́рзанное но нетле́нное, пла́том во гро́б собира́я, благоуха́ние осяза́ла, и благода́ть ве́лию позна́ла, и а́лую све́жую кровь с пла́та ска́пающую узре́ла, и в духо́внем ликова́нии воспе́ла та́ко, и мы с нею вкупе:
Ра́дуйся, я́ко в ри́зу испове́дничества во Оби́телех Го́рних обле́клся еси́;
Ра́дуйся, я́ко дерзнове́нием преподо́бия на Небеси́, препоя́сался еси;
Ра́дуйся, я́ко непостижи́мым про́мыслом Бо́жиим му́ченический вене́ц на главу́ прия́л еси́;
Ра́дуйся, я́ко со ли́ки Святы́х во Гра́де Нетле́ния, водвори́лся еси́;
Ра́дуйся, Евме́ние, ли́ка святи́тельскаго досто́йное украше́ние!

Конда́к 13

О пречу́дный, Архиере́я Предве́чнаго, служи́телю всеусе́рдный, па́мятуя, я́ко зало́г многоце́нный, напу́тствие твое́: «Кто за меня́ бу́дет моли́ться, того́ я помяну́ у Престо́ла Бо́жия», приими́ ны́не сие́ ма́лое моле́ние на́ше и исхода́тайствуй нам у Престо́ла Пресвято́й Тро́ицы до конца́ живота́ на́шего в ве́ре И́стинней Правосла́вней незы́блемо стоя́ти, по отше́ствии же от ми́ра сего́ в Небе́сныя Оби́тели всели́тися и во гряду́щем Воскресе́нии со Го́сподом неотсту́пно пребыва́ти, поя́ Ему́: Аллилу́ия.
(Сей кондак читается трижды)

И́кос 1

А́нгелов Творе́ц, Госпо́дь Вседержи́тель, благода́тию свое́ю возводя́ челове́ка в пе́рвое досто́инство на Небеси́, избра́ тя, о́тче Евме́ние, да во святи́тельстком чи́не послу́жиши Ему́. Ты же, посто́м и моли́твою а́нгельски над ми́ром многомяте́жным к высоте́ Небе́сней возше́л еси́, прославля́я Того́ глаго́лами богодухнове́нными. Мы же умиле́нным се́рдцем пое́м ти:
Ра́дуйся, избра́нниче от ю́ности Христа́ возлюби́вый;
Ра́дуйся, у́зким путе́м до гра́да Вы́шняго неукло́нно ше́ствовый;
Ра́дуйся, свети́льниче, десни́цею Всевы́шняго возже́нный;
Ра́дуйся, архипа́стырю Бо́жий вои́стину преосвяще́нный;
Ра́дуйся Евме́ние, ли́ка святи́тельскаго досто́йное украше́ние.

Конда́к 1

Избра́нный Це́ркви Зижди́теля крестоноси́телю ве́рный, страда́ния за Христа́ му́жественно претерпе́вый; любо́вь и́скреннюю па́ствы стяжа́л еси́, архипа́стырскими труда́ми Жи́тницы Небе́сныя наполня́л еси́, ве́рою и любо́вию Христу́ до конца́ послужи́л еси́. Мы же, творя́ще па́мять твою́ ублажа́ем тя си́це: ра́дуйся Евме́ние, ли́ка святи́тельскаго досто́йное украше́ние.

Молитва

О святи́телю Христо́в Евме́ние, досто́йнаго прее́мника апо́столом яви́ тя Госпо́дь. Велича́ем тя, земли́ Жито́мирския сосу́де избра́нный, о ста́де слове́сном неусы́пнаго к Бо́гу моли́твенника, ны́не со Го́сподом во оби́телех Го́рних пребыва́ющаго.
О достохва́льне Евме́ние, бу́ди за ны пред Го́сподом при́сный хода́таю: утверди́ в ве́ре благода́тной Правосла́вней, да́руй сто́йкость во испове́дании и́мени Христо́ва, ре́вность во исполне́нии за́поведей Его́, кре́пость в благоче́стии, неотсту́пность в моли́тве, серде́чное сокруше́ние в покая́нии, чистоту́ в мы́слех, кро́тость в словесе́х и простоту́ в дея́ниях.
Приклони́ к нам Боже́ственное милосе́рдие, да изба́вимся в день Стра́шнаго Суда́ ча́сти шу́ия и в ра́дость ве́чную всели́мся, сла́вяще Го́спода Вседержи́теля и твое́ благода́тное о нас к Нему́ предста́тельство во ве́ки веко́в. Ами́нь.

Величание

Велича́ем тя, / святи́телю о́тче, Евме́ние, / и чтим святу́ю па́мять твою́, / ты бо мо́лиши за нас / Христа́ Бо́га на́шего.

Тропарь, глас 4

Вы́шних и́́щуще ни́жняя оста́вил еси́, / в бде́ниих и труде́х свя́то подвиза́лся еси́́, / непра́ведная клеветы́ и заточения претерпе́́л еси́. / Се́рдцем же, вы́́ну боле́знуя о ста́де твое́м/ я́́ко богому́дрый святи́телю земли́ Поле́сския в моли́твах к Бо́гу простира́лся / к го́рнем ликостоя́ниям восте́кл еси́; / Те́мже зове́м ти святи́телю о́тче Евме́ние, / моли́ Христа́ Бо́га спасти́ся душа́м на́шим.

Кондак, глас 4

Бо́жия сло́ва служи́телю ве́рный, / Ду́ха Свята́́го сосу́де избра́нный богому́дре Евме́ние; / тече́ние жи́зни до́бре соверши́в, / ве́ру Христо́ву в гоне́ниих и страда́нии сохрани́л еси́, / архипа́стырское служе́ние в простоте́ серде́чней и му́дрости соверша́л еси́; / кро́тостию и ти́хостию нра́ва лука́вства враго́в Христо́вых победи́л еси́. / Па́мять же пресла́вная твоя́, / подвиза́ет благоче́стно с ве́рою и любо́вию поклоня́тися честны́м моще́м твои́м /и в пе́снех тя ублажа́ти.