Акафіст Всім святим землі Житомирської

загрузить акафист *.pdf, *.doc

АКА́ФИСТ
всем святы́м в земли́ Жито́мирстей просия́вшим

Кондак 1

Избра́ннии от ве́ка Про́мыслом Вы́шняго, зве́зды пресве́тлыя, Це́рковь на́шу украси́вшии, уго́дницы святи́и, в земли́ Поле́сской просия́вшии. Си́лою свы́ше осене́ннии преще́ний мучи́телей не убоя́вшиися, любо́вь к Бо́гу да́же до сме́рти яви́вшии и сим ри́зы ду́ши своя́ украси́вшии. Мы же, восхваля́я по́двиги ва́ша, мо́лим: помина́йте ны, смире́нно чту́щих вас: Ра́дуйтеся вси святи́и земли́ Жито́мирския, Це́ркви на́шея свети́льницы присногоря́щии.

Икос 1

А́нгелов Тво́рче и всего́ су́щего Соде́телю, отве́рзи ны́не уста́ на́ша, да досто́йно пе́сньми принесе́м благода́рственныя венцы́ к торжеству́ святы́х в земли́ Жито́мирстей просия́вших. Ве́мы вас, я́ко плод кра́сный вертогра́да Госпо́дня и Го́рняго Иерусали́ма насе́льниц, стезя́ми терни́стыми, труды́ по́стническими, кровьми́ страда́льческими и моли́твами зе́млю на́шу облагоуха́ли есте́. Ны́не Престо́лу Бо́жию предстоя́ще озари́те у́бо от Го́рних высо́т и сердца́ на́ша, да ра́достными гла́сы рцем вам си́це:
Ра́дуйтеся, жесто́ких мучи́телей стремле́ния ни во что вмени́вшии;
Ра́дуйтеся, сим безпло́тных ли́ки удиви́вшии;
Ра́дуйтеся, о́браз до́брых по́двигов нам оста́вльшии;
Ра́дуйтеся, пра́вый путь к Небеси́ нам показа́вшии;
Ра́дуйтеся, на Небеса́ со сла́вою возведе́ннии;
Ра́дуйтеся, с ли́ки а́нгельскими во Оби́тели ве́чныя вселе́ннии;
Ра́дуйтеся, Све́та Тро́ическаго при́снии зри́телии;
Ра́дуйтеся, ми́ра го́рняго блаже́ннии обита́телии.
Ра́дуйтеся, вси святи́и земли́ Жито́мирския, Це́ркви на́шея свети́льницы присногоря́щии.

Кондак 2

Ви́дя, я́ко преиспо́лнена земля́ на́ша чудотво́рными ико́нами Де́вы Преблагослове́нныя и преукра́шена Богоневе́стною сла́вою Ея́, разуме́ем сие́, я́ко благослове́ние Цари́цы Небе́сныя оте́честву на́шему. Не умолчи́м и мы, Богоро́дице, си́лы Твоя́ глаго́лати, вопия́ о Тебе́ Бо́гу песнь ве́лию, в Вы́шних трегу́бо песносло́вимую: Аллилу́иа.

Икос 2

Ра́зум духо́вный дарова́ нам Госпо́дь ублажа́ти Тя, Ма́ти Всепе́тая, я́ко Цвет Нетле́нный и я́ко Плод Благоуха́нный вышеа́нгельскаго бытия́ Твоего́. Све́тло красу́ется земля́ Жито́мирская о́бразами чудотво́рными и местночти́мыми, и́миже Влады́чица Всеми́лостивая, благода́ть сугу́бую, и то́ки чуде́с источа́я и луча́ми Ма́терния любве́ Твоея́ зе́млю на́шу освяща́я, и ду́ши на́ша согрева́я. О сем похвала́ми ублажа́ем Тя:
Ра́дуйся, и́ноком оби́тели Триго́рстей кре́пкое огражде́ние;
Ра́дуйся, се́страм оби́тели Ольхо́встей оби́льное утеше́ние;
Ра́дуйся, ве́рным ве́си Бежо́встей ве́лие упова́ние;
Ра́дуйся, лю́дям ве́си Колоди́евстей ми́лостивое заступле́ние;
Ра́дуйся, правосла́вным ве́си Пря́жевстей ско́рая помо́щнице;
Ра́дуйся, гра́ду Жито́миру в о́бразе Подо́льстем незри́мая покрови́тельнице
Ра́дуйся, во мно́зех святы́х о́бразех, земли́ Поле́сския всеце́лое освяще́ние;
Ра́дуйся, в по́двизех на пути́ ко спасе́нию незри́мое наставле́ние;
Ра́дуйтеся, вси святи́и земли́ Жито́мирския, Це́ркви на́шея свети́льницы присногоря́щии.

Кондак 3

Си́лу Вы́шний дарова́ вам на служе́ние, уго́дницы святи́и, я́ко исто́чницы преиспо́лненныя воды́ живы́я в земли́ на́шей излия́лися. Душ челове́ческих зе́млю изсо́хшую, за́поведями Ева́нгельскими напоя́я, стопа́м дре́вних святы́х после́довали есте́: скорбе́й не уклоня́лися, темни́ц не убоя́лися и многови́дныя му́ки, я́ко а́гнцы незло́бивии прия́ли есте́. Та́ко во тьме безбо́жия, путя́м спасе́ния, ве́рных науча́ли есте́; при́сно благодаря́ Бо́га и поя́ Ему́: Аллилу́иа.

Икос 3

Име́я ре́вность ве́лию по Бо́зе достосла́вне Евме́ние, святи́телю ди́вный земли́ Жито́мирстей, посреде́ гоне́ний и заточе́ния сосу́д избра́нный яви́лся еси́. Служе́ния Це́ркви не оста́вил еси́, смиренному́дрием све́тло укра́шен, моли́твою непреста́нною преиспо́лнен еси́. Чистото́ю и тишино́ю сия́я, венце́м неувяда́емым, уве́нчан еси́; моли́твы те́плыя, я́ко фимиа́м благово́нный, ко Вседержи́телю возно́сиши о нас, пою́щих тебе́:
Ра́дуйся, испове́дниче обе́тов и́ноческих храни́телю ве́рный;
Ра́дуйся, оби́тели Ки́ево-Пече́рстей би́сере многоце́нный;
Ра́дуйся, повеле́нием Цари́цы Небе́сныя, жезл архипа́стырскаго служе́ния досто́йно прия́вый;
Ра́дуйся, архиере́ю, вта́йне от ми́ра по́двиги и моли́твы соверша́вый;
Ра́дуйся, корми́лом церко́вным во дни гоне́ний прозорли́во управля́л еси́;
Ра́дуйся, ре́вностию о па́стве в кро́тости ду́ха пыла́л еси́;
Ра́дуйся, я́ко мо́щи твоя́ нетле́нныя, исто́чник исцеле́ния; ?
Ра́дуйся, гра́да Жито́мира моли́твенное заступле́ние;
Ра́дуйтеся, вси святи́и земли́ Жито́мирския, Це́ркви на́шея свети́льницы присногоря́щии.

Кондак 4

Бу́рю зло́бы и неи́стовства сил преиспо́дних попусти́ Го́спо́дь на зе́млю на́шу, да́бы испыта́ти лю́ди Своя́. Вас же обре́те, я́ко рабы́ бдя́щия, смире́нием и доброде́тельми укра́шенныя и му́жески во бра́нех стоя́щия. Ра́дуйся богохрани́мый гра́де Жито́мире и весели́теся ны́не лю́дие земли́ Поле́сския, я́ко таковы́х моли́твенников сподо́билися прия́ти есте́. И́хже при́сно велича́юще хвала́ми благода́рными, улу́чим и мы спасе́ния, в ве́чности воспева́я Бо́гу: Аллилу́иа.

Икос 4

Ви́деша лю́дие правосла́внии тя Фадде́е, вика́рие Волы́нский достохва́льный, я́ко испове́дника непоколеби́маго, с лице́м све́тлым ра́дость Пасха́льную всем возвеща́вый. Кро́тко омофо́р, я́ко крест, на ра́мена своя́ взем, путе́м тя́жких гоне́ний, лю́тых страда́ний и за Христа́ убие́нием, в ра́дость ве́чную всели́лся еси́ и в ри́зу златотка́нную свы́ше оде́ян еси́. Ве́руем, я́ко Престо́лу Бо́жию предстоя́, мо́лишися о всех воспева́ющих ти:
Ра́дуйся, Све́том Христо́вым, заблу́дшия просвеща́л еси́;
Ра́дуйся, ду́шу свою́ за па́ству полага́л еси́;
Ра́дуйся, клеветы́, оскорбле́ния и гоне́ния, с кро́тостию претерпе́л еси́;
Ра́дуйся, и в темни́це ми́лостыню безмо́лвно твори́л еси́;
Ра́дуйся, слу́жбу Бо́жию во у́зах соверша́л еси́;
Ра́дуйся, за вся смире́нно Го́спода благодари́л еси́;
Ра́дуйся, дар прозре́ния и утеше́ния от Го́спода прия́л еси́;
Ра́дуйся, венце́м трисве́тлым, святи́тельства, преподо́бия и му́ченичества уве́нчан еси́;
Ра́дуйтеся, вси святи́и земли́ Жито́мирския, Це́ркви на́шея свети́льницы присногоря́щии.

Кондак 5

Боготе́чныя зве́зды, зе́млю Жито́мирскую благода́тию озаря́ющии и моле́нием усе́рдным ко Го́споду нас просвеща́ющии. О́вии во святи́тельстве, ини́и в му́ченичестве и испове́дничестве, друзи́и во и́ночестве, во Христа́ ра́ди юро́дстве и в житии́ пра́ведном; вси же благоче́стием, преподо́бием и во И́стине стоя́нием Бо́гу послужи́вшии и в же́ртву Го́споду житие́ свое́ прине́сшии. Моли́теся о земны́х сро́дницех ва́ших, прославля́ющих Ди́вного во святы́х Свои́х Бо́га: Аллилу́иа.

Икос 5

Ви́деша лю́дие правосла́внии тя Арка́дие священному́чениче, я́ко стра́нника в труде́х па́стырских, поко́я не име́вшаго, сло́вом Бо́жиим и непреста́нными труда́ми уста́ безбо́жных загражда́вшаго. Ве́рными бра́тства Свя́то-Нико́льскаго мно́гих правосла́вных от гла́да изба́вльшаго и от раско́ла «живоцерко́внаго» на путь спасе́ния наста́вльшаго. Многоско́рбным житие́м, иера́рше Бо́жий, Гра́да Небе́снаго взыска́л еси́, сего́ ра́ди тебе́ вопие́м:
Ра́дуйся, бра́тство в двуты́сящи христиа́н правосла́вных основа́л еси́;
Ра́дуйся, в неви́димой бра́ни, ве́рных тве́рдо в ве́ре стоя́ти поуча́л еси́;
Ра́дуйся, житие́м свои́м ко Правосла́вию мно́гих возврати́л еси́;
Ра́дуйся, во труде́х просвети́тельских, же́ртвенно Це́ркве Христо́вой, послужи́л еси́;
Ра́дуйся, адама́нте ве́ры, узи́лищем темни́чным не сокруше́нный;
Ра́дуйся, му́ченическою кончи́ною, ко Христу́ вознесе́нный;
Ра́дуйся, кро́вию свое́ю зе́млю на́шу ороси́вый;
Ра́дуйся, пра́вую ве́ру во Пресвяту́ю Тро́ицу непоро́чно сохрани́вый;
Ра́дуйтеся, вси святи́и земли́ Жито́мирския, Це́ркви на́шея свети́льницы присногоря́щии.

Кондак 6

Пра́ведник и свети́льник земли́ Се́рбския яви́лся еси́ святи́телю Христо́в Марда́рие. От ю́ности рабо́тати Христу́ Еди́ному всем се́рдцем вожделе́в, суету́ ми́ра сего́ ни во что вмени́л еси́, и во гра́де Жито́мире благоче́стию и богосло́вию поуча́лся еси́. Духо́вныя по́двиги понеся́, вели́кий ревни́телю, правосла́вным, в да́льнем рассе́янии су́щим яви́лся еси́. Ны́не же и мы вку́пе со христиа́нами я́же судьба́ми Бо́жиими в земли́ чужде́й жи́тельствова, Бо́гу Еди́ному взыва́ем: Аллилу́иа.

Икос 6

Возсия́ свет святи́тельскаго служе́ния твоего́, пречу́дне Серафи́ме. Прему́дра храни́теля Ве́ры Правосла́вныя и и́стин Боже́ственных ревни́теля тя почита́ем. Ты бо, хито́н боготка́нный святооте́ческаго уче́ния непоро́чно соблю́л еси́. Па́ству свою́ утеша́я, ре́кл еси́: «Мы го́сти на земли́, пти́цы переле́тныя. Люта́ зима́, но сла́док Рай» сего́ ра́ди, благоче́стия непобеди́мому побо́рнику венцы́ хвале́бные прино́сим.
Ра́дуйся, во́лю Бо́жию в житии́ свое́м непреста́нно иска́вый;
Ра́дуйся, сего́ ра́ди про́мыслом Бо́жиим руководи́мый;
Ра́дуйся, во изгна́нии любо́вь ко оте́честву сохрани́л еси́;
Ра́дуйся, с бо́лью в се́рдце скорбя́щем, за Русь Святу́ю всегда́ Христа́ моли́л еси́;
Ра́дуйся, богосло́вия святооте́ческаго и́стинный ревни́телю;
Ра́дуйся, ве́ры Правосла́вныя непоколеби́мый храни́телю;
Ра́дуйся, медоно́сными устна́ми, во испыта́ниях Це́рковь стра́ждущую, укрепля́л еси́;
Ра́дуйся, в пра́здник Торжества́ Правосла́вия во оби́тели Це́ркви торжеству́ющей возше́л еси́;
Ра́дуйтеся, вси святи́и земли́ Жито́мирския, Це́ркви на́шея свети́льницы присногоря́щии.

Кондак 7

Хотя́ще ве́чное спасе́ние улучи́ти, всеблаже́ннии Проко́пие, Парфе́ние и Иоаса́фе, в учи́лище па́стырства ю́ных ду́ши назида́ли есте́. Вертогра́д Го́сподень, зно́ем безбо́жия изсуша́емый, животво́рною вла́гою слове́с напоя́я и добро́тою благоче́стия назида́я, святи́тельский жезл служе́ния восприя́ли и му́ченическую кончи́ну прия́ли есте́. С ни́ми же и ты, Иерофе́е, вика́рий Волы́нский и ста́рче оби́тели Де́рманския, в преподо́бии просия́вший. Вку́пе же вы дерзнове́нно на Небеси́ укрепля́вшему вас в по́двизех Царю́ Сла́вы возно́сите: Аллилу́иа.

Икос 7

Но́ваго би́сера церко́внаго вся све́том Ве́ры Христо́вой озаря́юща, показа́ тя Го́сподь, Амвро́сие, архипа́стыря богоблаже́ннаго. Сло́вом Бо́жиим, я́ко мече́м обоюдоо́стрым тьму неве́рия рассека́я и вся́кое беззако́ние облича́я, в же́ртву благоприя́тную Бо́гу себе́ принесы́й, му́ченик лик умножа́я. Сего́ ра́ди взыва́ем ти:
Ра́дуйся, кла́се це́льный, стори́чный плод принося́щий;
Ра́дуйся, цве́те многоцве́тный, благоуха́ния ве́ры источа́ющий;
Ра́дуйся, же́зле архипа́стырский, слове́сных ове́ц оберега́ющий;
Ра́дуйся, адама́нте ве́ры, стоя́нию в И́стине, науча́ющий;
Ра́дуйся, гро́здие многопло́дная, а́лчущия пра́вды насыща́ющая;
Ра́дуйся, свеще́, све́том Богове́дения тьму неве́рия разгоня́ющая;
Ра́дуйся, дре́во многоли́ственное, ни́щих ду́хом покрыва́ющее;
Ра́дуйся, ве́твие Лозы́ Христо́вы, в Ца́рствии Небе́снем, прозя́бшее;
Ра́дуйтеся, вси святи́и земли́ Жито́мирския, Це́ркви на́шея свети́льницы присногоря́щии.

Кондак 8

Стра́нник в ми́ре сем быв и Го́рняя му́дрствуя, всего́ себе́ на служе́ние Це́ркве отда́л еси́, священному́ченниче Наза́рие. Во гра́де Жито́мире потруди́лся еси́, по́слежде оби́тели Грузи́нския окормля́я, испове́дником ве́рным и столпо́м непоколеби́мым наре́клся еси́. Да́же до кончи́ны му́ченичестей, служе́ния святи́тельскаго не оставля́я во Оби́тели Ра́йския всели́лся еси́, иде́же с ли́ки а́нгельскими воспева́еши: Аллилу́иа.

Икос 8

Весь хвала́ Бо́гу и же́ртва жива́я яви́лся еси́ преподобному́чениче Мака́рие, чудотво́рче преизря́дный. Даде́ся ти благода́ть, Сло́во Бо́жие ми́ру гре́шному веща́ти, ве́ру оте́ческую непоколеби́мо храни́ти, во́лны нече́стия тве́рдо угаша́ти, крест страда́ний досто́йно прия́ти и во Оби́тели Го́рняя взы́ти. О сем прино́сим ти хвале́ния такова́я:
Ра́дуйся, Правосла́вия пропове́дниче сла́вный;
Ра́дуйся, благоче́стия се́ятелю неуста́нный;
Ра́дуйся, заблу́дших наста́вниче прему́дрый;
Ра́дуйся, стра́ждущих, цели́телю пресла́вный;
Ра́дуйся, и́стин Боже́ственных испове́дниче благочести́вый;
Ра́дуйся, гра́да О́́вруча моли́твенниче ди́вный;
Ра́дуйся, врага́ на́шего спасе́ния, ве́рою и моли́твою уязвля́ющий;
Ра́дуйся, А́нгелом ликова́ние неизрече́нное;
Ра́дуйтеся, вси святи́и земли́ Жито́мирския, Це́ркви на́шея свети́льницы присногоря́щии.

Кондак 9

Вся́ка благода́ть дана́ ти Алекса́ндре, протопресви́тере сла́вне. Си́ла Бо́жия тя се́рдцем моли́твенным облагодати́, умо́м нерассе́янным озари́, во́лею тве́рдою укрепи́ и устны́ пла́менными вооружи́. Сего́ ра́ди Сло́во Бо́жие веща́л и труды́ па́стрыския неуста́нно исполня́л. Боле́знуя се́рдцем о земли́ на́шей, ка́иновым грехо́м объя́той, в моли́тве непреста́нной пребыва́л еси́. Ны́не же, кро́вию му́ченическою обагре́н, взира́еши на Го́спода, воспева́я: Аллилу́иа.

Икос 9

Вити́йственных слове́с плете́ние не довле́ет восхвали́ти досто́йно кре́пость и кро́тость твою́, егда́ клеве́тницы лука́выя, та́тие и хи́щницы, вся́кия испо́лньшеся я́рости, на тя возста́ша о́тче Па́вле, ты же отве́рстым се́рдцем прия́л еси́ глас Боже́ственныя любве́: «и́же хóщет по Мнe ити́ да отвéржется себé, и вóзмет крeст свoй, и по Мнe грядéт», То́му невозвра́тно после́довал еси́, подвиза́я ны согла́сно пе́ти ти:
Ра́дуйся, клевету́ и поруга́ние с кро́тостию прия́вый;
Ра́дуйся, ди́вную кре́пость духа в заточе́нии показа́вый;
Ра́дуйся, бие́ние лю́тое от зверонра́вных претерпе́вый;
Ра́дуйся, в муче́нии огне́м от безбо́жных несокруше́нный;
Ра́дуйся, сто́лпе терпе́ния, зло́бою челове́ческою неуя́звленный;
Ра́дуйся, ка́мене ве́ры, ко́зни диа́вольския посрами́вый;
Ра́дуйся, неизрече́нную сла́дость небе́сную вкуси́вый;
Ра́дуйся, би́сере драги́й, во юдо́лех земны́х, Го́сподом обрете́нный;
Ра́дуйтеся, вси святи́и земли́ Жито́мирския, Це́ркви на́шея свети́льницы присногоря́щии.

Кондак 10

Спа́су Хри́сту, Богото́чною Кро́вию род челове́ческий искупи́вшему и обнови́вшему, после́довали есте́ отцы́: Ми́роне, Корни́лие и Неофи́те, ве́твия млады́я семина́рии Волы́нския. Служи́телие Боже́ственныя сла́вы и Све́та Непресту́пнаго прича́стники. Во страда́ниях тя́жких, непреста́нно упова́я на Бо́га, я́ко священноа́гнцы, убие́ние прия́ли есте́, поя́ Творцу́: Аллилу́иа.

Икос 10

Сте́ны темни́чныя, я́ко све́тлый черто́г бы́ша ти, о́тче Аре́фо. Любо́вь Христо́ву в се́рдце име́я, преще́ния нечести́вых ни во что вмени́л еси́. И я́ко па́стырь до́брый, ду́шу свою́ за па́ству положи́л еси́. Сего́ ра́ди, священному́чениче сла́вне воспое́м ти:
Ра́дуйся, я́ко рожде́нием свои́м, селе́ние До́вжик просла́вил еси́;
Ра́дуйся, я́ко земли́ Жито́мирстей па́стырь сла́вный, яви́лся еси́;
Ра́дуйся, я́ко ра́ну раско́ла старообря́дческаго, ре́вностно врачева́л еси́;
Ра́дуйся, я́ко в Це́ркви единове́рчестей, любо́вь Христо́ву явля́л еси́;
Ра́дуйся, я́ко тьму раско́ла, све́том ве́ры и́стинныя разгна́л еси́;
Ра́дуйся, я́ко мно́жество ове́ц слове́сных, во огра́ду спаси́́тельную приве́л еси́;
Ра́дуйся, я́ко храм Иоаки́́ма и А́нны, от поруга́ний безбо́жных сохрани́л еси́;
Ра́дуйся, я́ко житие́м и кончи́ною, о́браз ве́рным показа́л еси́;
Ра́дуйтеся, вси святи́и земли́ Жито́мирския, Це́ркви на́шея свети́льницы присногоря́щии.

Кондак 11

Пе́ние хвале́бное возно́сим ти, священному́чениче Макси́ме, па́стырю до́брый, от Го́спода дерзнове́ние равноапо́стольнаго служе́ния име́вый. Во дни ско́рбных испыта́ний от е́реси лати́нския и лю́тых гоне́ний от вла́сти а́встро-уго́рския Правосла́вие искореня́ющих: столпо́м ве́ры, пропове́дником пла́менным и гони́мых защи́тником был еси́. Со слова́ми во уста́х: «да живе́т Свято́е Правосла́вие», ко Го́споду му́ченически преста́вился еси́, восклица́я Ему́: Аллилу́иа.

Икос 11

Свети́льника ве́ры и па́стыря неустанного воздви́же Христо́с во оте́честве на́шем. Во дни гоне́ний, о́тче Васи́лие, бре́мя па́стырскаго служе́ния на ра́мена своя́ подъя́л еси́ и на Поме́стнем собо́ре от земли́ Поле́сския предста́л еси́. Па́стырю неустраши́мый, пропове́дниче сладкогла́сный и испове́дниче сла́вный. Ве́мы, я́ко ны́не у Престо́ла Сла́вы за оте́чество земно́е хода́тая и́мамы, хва́лим тя:
Ра́дуйся, ра́лом слове́с свои́х, сердца́ ю́ных возде́лывающий;
Ра́дуйся, плоды́ се́яния твоего́ в ве́чности зря́щий;
Ра́дуйся, чад свои́х на путе́х стра́нствия земна́го направля́ющий;
Ра́дуйся, па́ству твою́ спасе́нную, на поклоне́ние ко Го́споду приводя́щий;
Ра́дуйся, о́тче собо́ра поме́стнаго, Правосла́вие утвержда́ющий;
Ра́дуйся, испове́дниче собо́ра святы́х, в моли́тве неугаса́ющий;
Ра́дуйся, до́льнаго ми́ра, изгна́нниче безви́нный;
Ра́дуйся, Го́рняго ми́ра, избра́нниче благослове́нный;
Ра́дуйтеся, вси святи́и земли́ Жито́мирския, Це́ркви на́шея свети́льницы присногоря́щии.

Кондак 12

Благода́ть неистощи́мая дана́ ти от Го́спода, сла́вне му́чениче Нико́лае, писмена́ми богому́дрыми и сло́вом о́гненным из сете́й лжеуче́ний к ве́ре оте́честей возвра́щати, и от греха́ пия́нства к тре́звости и моли́тве воздвиза́ти, и под Покро́в Пречи́стыя Засту́пницы, Ма́тери Све́та ду́шу всеце́ло предава́ти. И ты, му́ченице Ве́ро достохва́льная; не́мощь естества́ же́нскаго ве́рою во Христа́ победи́вшая. Му́дрости дев ева́нгельских подража́вшая, за духо́вным отце́м свои́м в гоне́нии да́же до заточе́ния и сме́рти после́довавшая. Велича́ем по́двиги ва́ша, му́ченицы Христо́ви пресла́внии, ны́не во оби́телех Го́рних Бо́гу непреста́нно воспева́ющих: Аллилу́иа.

Икос 12

Пою́ще твою́ небе́сную сла́ву, свята́я преподобному́ченнице Анастаси́е, в дре́внем Ри́ме просия́вшую, и на Святе́й горе́ Афо́нстей со Пресвято́ю Богоро́дицею за и́ноков оби́тели Григориа́тския сугу́бо моля́щуюся. Хода́таице благода́тная яви́лася еси́ и за лю́ди земли́ Жито́мирския, чрез нетле́нную главу́ твою́ сокры́тую, тьмочи́сленнии чудеса́ источа́ющую. Огради́ нас богоприя́тными моли́твами твои́ми и приими́ от нас моле́ние ма́лое сие́:
Ра́дуйся пресла́вная трехле́тняя отрокови́це, во и́ночество избра́нная;
Ра́дуйся свяще́нных науче́ний блаже́нныя Софи́и, послу́шнице пречу́дная;
Ра́дуйся о́браз чистоты́ и целому́дрия показа́вшая;
Ра́дуйся му́ченице в бра́чном одея́нии непоро́чности, Хри́сту предста́вшая;
Ра́дуйся за зе́млю на́шу покрови́тельнице неодоли́мая яви́лася еси́;
Ра́дуйся со приснопа́мятною схимона́хинею Рафаи́лою оби́тель и́ноческую во гра́де Жито́мире воздви́гла еси́;
Ра́дуйся се́страм оби́тели сей незри́мо по́мощь и утеше́ние Боже́ственное явля́ющая;
Ра́дуйся хода́тайством свои́м, чту́щим страда́ния твоя́, две́ри Жи́зни ве́чныя отверза́ющая;
Ра́дуйтеся вси святи́и земли́ Жито́мирския, Це́ркви на́шея свети́льницы присногоря́щии.

Кондак 13

О пресла́внии уго́дницы Бо́жии, вси святи́и в земли́ Жито́мирстей просия́вшии, зде на́ми имено́вании; я́влении и нея́влении, Бо́гу же ве́домыя. Вы есте́ свети́льницы Све́та Невече́рняго, у Престо́ла Пресвяты́я Тро́ицы предстоя́щии и со а́нгельскими чи́нми в моли́тве присногоря́щии. Прими́те ма́лое сие́ моле́ние на́ше, в похвалу́ вам ны́не приноси́мое. Моли́теся ко Христу́ Бо́гу, да утверди́т в земли́ на́шей ве́ру Правосла́вную, да укрепи́т в ней дух благоче́стия, и сподо́бит нас ку́пно с ва́ми воспева́ти Ему́: Аллилу́иа.

Молитва
всем святы́м в земли́ Жито́мирстей просия́вшим

О, Богопросвеще́нные уго́дницы Бо́жии, земли́ Жито́мирския предста́тели и покрови́тели, во́ины Христо́ви, смиренному́дрием и духо́вными по́двиги врага́ до конца́ низложи́вши. Моли́твами ва́шими Це́рковь непоколеби́му соблюди́те, оте́чество на́ше в безмяте́жии сохрани́те, в сердца́х на́ших дух покая́ния насади́те, ум па́мятию сме́ртною отрезви́те и во́лю ко исполне́нию за́поведей Боже́ственных укрепи́те. Испроси́те нам у Пода́теля благ ве́чных би́сер драгоце́нныя ве́ры, непреста́ннаго моли́твеннаго воздыха́ния в кро́тости ду́ха, серде́чнаго сокруше́ния и пла́ча о гресе́х на́ших. Умоли́те Го́спода на́шего Иису́са Христа́ пути́ земна́го стра́нствования на́шего к Го́рнему Оте́честву напра́вити, ми́ром и любо́вию оживотвори́ти и Свои́м Боже́ственным милосе́рдием покры́ти.
О, собо́ре святы́х, предстоя́й днесь Престо́лу непристу́пнаго Све́та, помяни́те бра́тию, сесте́р и сро́дник на́ших, пре́жде отше́дших, да вси мы вку́пе соблю́дше сокро́вище ве́ры, приста́нище ве́чнаго спасе́ния дости́гнем и во блаже́нных оби́телех водвори́мся, иде́же со Пресвяте́й Влады́чицей на́шей Богоро́дицей и Присноде́вой Мари́ей, небе́сными си́лами безпло́тными и все́ми святы́ми, непреста́нное славосло́вие и поклоне́ние принесе́м Безнача́льному Отцу́, со Единоро́дным Его́ Сы́ном и Животворя́щим Ду́хом в безконе́чныя ве́ки. Ами́нь.

Тропарь Жито́мирским святым, глас 4-й

Многосве́тлии свети́льницы, Богодарова́нное украше́ние земли́ Жито́мирския, святи́телие и преподо́бнии, му́ченицы, испове́дницы, вку́пе же и пра́ведницы в разли́чных о́бразех жития́ любо́вь Христо́ву стяжа́вшии, в Небе́сных черто́зех возси́яли есте́. Моли́те, да утверди́т Го́спо́дь в Правосла́вии и благоче́стии Оте́чество на́ше и спасе́т ду́ши на́ша.